18,524 ka mga pasyente natambalan nga libre sa Comval Provincial Hospitals sulod sa unom ka bulan

Compostela Valley Province–18,524 na ka mga pasyente sa Comval Provincial Hospitals ang natambalan nga libre sa mga bulan sa Enero hangtud Hunyo sa 2019  lang, ug mas daghan kanila ang natambalan diha sa CVP Montevista nga miabot og 9,806 ang kinatibuk-ang ihap sa mga pasyenteng way nabayrang Hospital Bills sa rason nga sila kabus ug lisud ang kahimtang sa ilang pamuyo.

Parte sa Curative Aspect sa Health Care Services Delivery nga gipakusog sa Comval ni Gov. Jayvee Tyron Uy ug SP Members sa pagpanguna nila ni Vice Gov. Maricar Zamora ug Senior Board Member Arturo “Chiongkee” Uy ang pagtabang sa kabus nga mga pasyente nga malibre sa ilang mga bayronon diha sa upat ka mga hospital sa probinsiya

nga mao ang CVPH Montevista, CVPH Pantukan, CVPH Laak, ug CVPH Maragusan.

Ang pinakaulahing report nga gipagula ni PEEMO Chief Dr. Ferdinand Anthony Soberano pinaagi ni Supervising Administrative Officer Gary C. Alonsabe nagtug-an nga sa Enero- Hunyo,2019 miabot sa 19,361 ang Total Hospital Admissions ug gikan niini ang 18,524 kinatibuk-ang ihap sa mga pasyente nga natambalan  nga libre ilalom sa Charity Program ug sa Zero Balance Billing sa gobyerno.

Apil kanila ang 3,424 ka mga pasyenteng dunay  Philhealth nga dili government sponsored ug ang 1,150 ka mga Senior Citizens ilalom sa Lifetime Program nga pulos natabangan sa pundo gikan sa Pagkalinga Sa Bayan (PSB) Program ni Gov. Tyron Uy ug sa Office of the President.

Para sa tuig 2019 si Gov. Tyron naggahin og P200 Milyones pundo para sa Pagkalinga sa Bayan Program aron mas daghang pasyente sa CVPH nga walay mabayrang Hospital Bills ilalom sa Zero Balance Billing Policy.

Covered na niini matud ni Protective Services Division Chief Preciosa Toledo sa PSWDO, kadtong mga pasyenteng enrolled sa Government Sponsored Philhealth ug bisan dili Government Sponsored basta sila kabus ug lisud ang kahimtang sa ilang pamuyo. #YEStoDavaoDeOro (Gilbert M Cabahug, IDS Comval)

Related Post