Bulawan Festival 2023, gipabati sa hilit nga lugar sa probinsya

Subay sa selebrasyon sa Bulawan Festival 2023 ug 25th Founding Anniversary sa Davao de Oro, gipabati pag-usab sa panggamhanang probinsyal sa pagpangulo ni Governor Dorothy Gonzaga ang bulawanong selebrasyon niini sa mga hilit nga lugar sa probinsya.

Niadtong March 4, 2023, ubay-ubay nga mga probisyon ug serbisyo, mapa pang-edukasyon, panglawas, pang-agrikultura ug uban pa, ang nadawat sa katawhan sa Sitio Estabillo, Brgy. Andili sa Mawab.

Lakip niini ang libreng medical check-ups, gupit, tuli, alis bukol, vaccination, dental, maternal health services, animal health services, legal services, ug ang pagpanghatag sa mga school/hygiene supplies, tanom, tambal, food packs ug uban pa.

Namulong sa maong kalihokan si Governor Gonzaga diin mihatag og gibug-aton sa kamahinungdanon sa maong lakang ug pagsiguro nga ang matag lugar adunay access sa mga batakang serbisyo, bisan asa pa ang lokasyon niini. Gipasiugda usab niya ang papel sa security sector sa ilang presensya, hinungdan sa paghatag sa usa ka luwas nga probinsya ug arun mahatud ang mga angay nga serbisyo sa katawhan.

Mapasalamaton ug malipayon gayud si Brgy. Tribal Chieftain Angel Tabid sanglit nadungog gayud sa gobyerno ang ilang mga hanyu ug naghinaot usab sila sa dugang pa nga programa nga muabot kanila sama sa dugang dalan arun hapsay ang pagbiyahe sa ilang mga produktong uma ngadto sa sentro.

Dugang pa, gipakita sa katawhan ang ilang mainitong pagpasalamat pinaagi sa usa ka Cultural Dance Presentation nga nagtanyag usab sa dato nga kultura sa kumunidad.

Nakigtimbaya usab sila 2nd District Rep. Congressman Ruwel Peter Gonzaga, BM Teodoro Arancon, Mayor Ruperto Gonzaga III, 28IB Commander Ronilo Desingano, PSWDO head Josephine Frasco kauban ang mga local nga opisyales, kapulisan ug kasundaluhan.

Ang Bulawanong Hatud Serbisyo kabahin sa mas dako nga inisyatibo sa gobyerno, kauban ang security sector, nga gitumong sa pagdala og kalambuan sa mga lugar ilabina sa mga kanhing conflict affected o vulnerable areas sa probinsya. (Jaynus Fernandez, Photos by Jonie Cadiz)