118 empleyado sa PLGU-DdO gipasidunggan, gihatagan og ganti sa ika-123 PH Civil Service Anniv

Sabay sa pagsaulog sa ika-123 nga anibersaryo sa Philippine Civil Service sa nasud, gihataan og pasidungog sa panggamhanang probinsyal ilalom sa pagdumala ni Davao de Oro Governor Dorothy P. Montejo-Gonzaga ang 118 empleyado niini nga mihatag og dakong kontribusyon sulod sa pila ka tuig nga pagpanerbisyo sa katawhan.

Ang pag-ila ug paghatag og bili kanila nahitabo sa Activity Hall niining kapitolyo atul sa awards rites karung buntaga, Septyembre 11 ning tuiga.

Sa gipadangat nga mensahe ni Governor Gonzaga, giila niini ang mga kaagi ug kadasig sa maong mga empleyado arun lamang mahatud ang mga angay nga serbisyo nga gikinahanglan sa katawhan.

Matud niya, “Dili sayun mahatagan og opportunity to remain in the government service, the fact that you are awarded awards today, 10-35 years, pasabot dili pud lalim ang inyung giagian nga mga challenges while under employ of the PLGU. Despite ana nga challenges, na survive ninyu with flying colors.”

Dose (12) ka empleyado ang nahatagan sa Loyalty Award human sa ilang 10 ka tuig nga pagpanerbisyo samtang 22 ka empleyado nga 15 ka tuig nga nagserbisyo, 14 ka empleyado nga 20 ka tuig nga nagserbisyo, 34 ka empleyado nga 25 ka tuig nga nagserbisyo, 6 ka empleyado nga 30 ka tuig nga nagsebisyo, ug 2 ka empleyado nga 35 ka tuig nga nagserbisyo ang nakadawat sa parehong ganti.

Dugang pa, ang Career and Self-Development Award gihatag ngadto sa 10 ka empleyado human kini makapasa sa nagkalain-laing board examinations sama sa Local Treasury Examination, Psychometrician Licensure Examination, ug Psychologist Licensure Examination. Nahatagan usab sa parehong ganti ang 2 ka empleyado nga nahuman ang ilang Bachelor’s Degree ug 16 ka empleyado nga nahuman ang ilang Master’s Degree.

Gipahinumdoman usab sa Gobernadora ang mga empleyado nga sa ilang pagpili nga mahimong public servant dapat nila kining puy-an nga ang pagserbisyo kay “not for compliance” apan kini buhaton para sa kaayuhan sa katawhan.

“Dili pani mao ang ending … because you are already in love with how you give service to the people…Wish nako tagaan pamo og dugang healthy years, healthy in the sense nga mabuhat pa ninyu kung unsa inyung mga task sa trabaho” dugang ni Governor Gonzaga.

Samtang ang probinsya naglantaw sa umaabot, kining 118 ka mga empleyado magpadayon nga mahimong inspirasyon sa ilang mga kaubanan human sa ilang dedikasyong gipakita sa ilang padayung pagpalambo sa ilang kaugalingon ug pagpangalagad sa publiko nga sa walay pag-duhaduha moduso kini sa dugang pag-uswag ug kalamboan sa probinsya sa umaabot nga katuigan. (Jaynus Fernandez, Photos by A. Dayao)