G-Works para sa Wastong Nutrisyon, gilusad sa Davao de Oro

Gilusad karung adlawa (Nobyembre 28, 2023) ang “G-works para sa Wastong Nutrisyon” diin baynte siyete (27) ka mga bata nga nag edad 6-59 months old gikan sa munisipalidad sa Pantukan ang moagi sa 120 ka adlaw nga rehabilitasyon aron mapataas ang ilang kahimtang sa nutrisyon.

Gipatigayon ang maong paglusad sa Provincial Capitol Lobby ug gipartisiparan kini sa mga batang benepisyaryo kauban ang ilang mga ginikanan.

Sabay usab nga mipirma sa Pledge of Commitment si Governor Dorothy P. Montejo-Gonzaga nga girepresentahan ni PGSO Head Dennis Anduyan, Pantukan Mayor Leonel Ceniza nga girepresentahan ni SB Joan C. Damigan, kauban ang mga members of the Provincial ug Municipal Nutrition Councils, Barangay Nutrition Scholars sa Pantukan, ug stakeholders gikan sa National Government Agencies (NGAs).

“We would like to gain the desired weight para sa atong mga benipisyaryo arun inig human sa 120-day program sakto na ilang timbang…ang atong gobernadora kanunay andam mutabang para sa kalampusan sa atong programa labi na diha sa mga hagit sa panglawas,” matud ni PGSO Head Anduyan.

Dugang pa, mihatag usab og mensahe pasalamat ang Pantukan pinaagi ni SB Damigan humanang napili ang lungsod sa maong programa. Saysay niini nga “karung adlawa nabati namo ang usa ka gobyerno nga wala kami pasagdi…nadungagan gayud og pangpangga tungod anaa ang provincial government nga naghatag sa dugang serbisyo ngadtu sa atong kabataan.”

Samtang, gibubo usab ang nagkalain-laing serbisyo sa mga benipisyaryo sama sa pagpanghatag sa mga food packs, school bags ug ang libreng medical check-up ug haircut nga gipahitabo sa Children’s Park niining kapitolyo.

Anaa usab mihatag sa ilang suporta si BM Ruwina Gonzaga, BM Marie Jude Fuentes-Lopoz, BM Vivencia Secuya, PHO Assistant PG Heads Dr. Mary Cyrel Pasaol ug Dr. Abigail Amores, ug uban pa.

Ang maong programa parte sa Adopt-A-Child Program sa Provincial Nutrition Council diin ang matag opisina sa panggamhanang probinsyal uban sa tabang sa NGA’s sama sa DepEd, DOLE, DTI, DOST, NFA, NCIP, DILG, PDOHO, PNP ug sa cooperative sama sa NICO nga naghatag og supporta sa mga malnurished nga bata.

Mahinumduman nga kaniadtong Nobyembre 21-23, gibisita mismo sa mga Provincial Nutrition Focals ang kahimtang sa 27 ka malnurished nga bata ug naghatag og orientasyon sa mga ginikanan kabahin sa maong programa. Laumang matapos ang maong rehabilitasyon sa sunod tuig sa bulan sa Marso. (Jaynus Fernandez, Photos by A. Dayao)