Pagtukod sa 2 Classroom Buildings sa Brgy. Manurigao nagsugod na

Compostela Valley Province-Nahimutang sa tungang bahin sa usa ka forest Area sa  New Bataan ang Purok Danawan, Brgy. Manurigao nga karon gitukoran sad sa probinsiya sa 2 Classroom Building ilalom sa “OPLAN Pagbabago: Bayanihan sa Paaralan” nga gipakusog sa Comval ni Gov. Jayvee Tyron Uy ug SP Members sa pagpanguna nila ni Vice. Gov. Maricar Zamora ug Senior BM Arturo “Chiongkee” Uy.

Moabot matud ni Gov. Tyron Uy sa 11 Classrooms ang gitabangan og tukod sa mga katawhan diha sa lima ka mga School Sites. 3 Classrooms matud pa niya ang gitukod sa Purok 10 Sitio Sapang Lubog,  Brgy. Tibagon, Pantukan nga maoy labing daghan.

Samtang tag 2 Classrooms ang sa Purok 4-B Mangayon, Compostela; ang sa Purok Danauan, Manurigao, New Bataan; ang sa Prk.3, Brgy. Panansalan, Compostela; ug ang sa Prk.3 Sitio Bongloy, Brgy. Pagsabangan, New Bataan.

Dungan nga gitukoran ang sa upat ka mga School Sites. Samtang, tungod grabe ka tuyoon kay nahimutang sa tungang bahin sa forest area, naulahi’g diyutay ang sa Purok Danoan Manurigao nga ang pagsugod og tukod nahitabo niadtong Domingo (Sept. 29,2019) diin maoy nangulo sa Bayanihan Build Kick Off Ceremony sila si Mayor Gerald Ford Balbin, kauban si Ed.D Ramon J. Reponte ug 66th Infantry Battalion LTC Roman S. Mabborang ug BM Raul Timogtimog, nga maoy mihatag sa mensahe ni Gov. Tyron Uy.

Buntag niadtong Domingo ang mga dagkong opisyal sa probinisya ug sa MLGU New Bataan kauban ang mga sakop sa media ug mga opisyal sa kasundalohan, ang sayong migikan sakay sa usa ka helicopter paingon sa Brgy. Manurigao aron sugdan pinaagi sa usa ka Kick-off Ceremony ang Construction sa 1 Unit 2 Classroom Building diha sa Purok Danauan.

Panahon nga Board Member pa si Gov. Tyron Uy naghimo sa iyang unang exploratory visit sa Brgy. Manurigao niadtong Hulyo 14-16,2015 diin iyang gihulagway base sa gihimo niyang pagbisita nga kini naa sa pusod nga bahin sa usa ka forest area sa New Bataan ug nagpuyo niini ang kapin kon kulang 1,700 ka mga individual nga lun-lon Tribung Mandaya ug pipila lang sa mga magtutudlo nga nakasagol ang dili IP.

Matud pa niya nga sulod lang sa tulo ka adlaw niyang pagbisita personal niyang nasaksihan ug nasinati ang talagsaong bahandi sa kinaiyahan nga padayong gitipigan sa  usa ka Community nga lunlon IP ang mga residente, ug sulod sa mubong panahon nga pagpakig-uban kanila siya nakadayeg ug dako sa talagsaong kabuotan ug hospitality nga padayong gibansay sa Tribu subay ang ilang lumadnong kultura. Gani sulti sad niya nga walay problema sa pagkaon ang mga katawhan didto timaan sa ilang pagkakugihan.

Kon mosulod ka sa Brgy. Manurigao imong makita ug masaksihan ang lunhawng palibot nga daw wala pay nakataak tungod sa daghang mga dagkong punoan nga nagbarog uban ang mga kalanggaman ug mga unggoy nga magarbohon sa ilang mga huni ug mga hadla nga ingon sa gipanghambog ang bahandi sa kinaiyahan nga padayong gialima sa lumadnong kultura aron magpabilin sa lunsayng kanindot ug talagsaong katahom.

Sa Tribal Village sugaton ka sa usa ka community nga mapahiyumon ug maabi-abihon nga magdalit kanimo sa lami kaayong denorado ug uban pang klase sa mga upland rice nga paboritong kan-onon sa tribu nga idulot ug dungan sa Lulot (Lyurot) ug sa laming putahe sa binaw, baboy ihalas, ug uban pang karne gikan sa inihawng mga kahayupan nga binuhi sa tribo.

Sulti sad niya nga tungod sa madanihong katahom sa Malumagpak Falls ug sa bulawanong kasingkasing sa Tribung Mandaya nga usa sa pinakaabuotan ug very hospitable nga Tribu sa Comval Province, sa dili madugay mamahimo gyod nga usa sa mga  nag-unang “Tourist Destination Sites” sa probinsiya ug bisan sa nasud ang Brgy. Manurigao sa New Bataan.

Ang Brgy. Manurigao naa sa gikan upat hangtud lima ka oras nga biyahe gikan sa Brgy. Poblacion sa New Bataan, ug kon mosulod ka paingon sa Mandaya Village maoy imong pagaagian ang dalan nga hinimo sa mga kamot sa nagkahiusang tribu nga sa isigka-kilid nagbarog ang nangandila pa nga mga dagkong punoan sa kahoy nga wala pa nahilabtan. (Gilbert M. Cabahug, PAO-ID Comval)

Gisugdan sa mga visitors, builders, partners ug mga volunteers ang Bayanihan Sa Paaralan 2019 Build sa Brgy. Danauan Manurigao, New Bataan Comval Province niadtong September 29, 2019. Sakop sa Build ang duha ka Classroom School Building, 1 unit Duplex Teacher’s Cottage ug 1 unit Kusina ng Kalinga Special Case. 

Related Post