“Kami karon, gapasalamat mi tungod ang sa una lahi ra gyud. Mubaktas [ug] magmotor pero lisod ra gihapon [mubiyahe]. So karon, nindot na ug makaagi na ang mga dagkong sasakyan. [Ang gobyerno] ang nahimong [paagi] nga makaanhi ang tanang makahimo [og paagi] nga makabalo mi sa mga butang nga para sa among kaugalingon [ug] para pud sa community.”

Kini si Anle Maestro, 35 y/o ug residente sa Manurigao, New Bataan sulod sa 10 ka tuig. Nanginabuhi siya pinaagi sa mga luy-a, abaka, ug pagtanom og lain-laing mga gulay tungod mao kini ang usa sa mga nahauna nga mga gigikanan og kita sa ilang barangay nga giilang pinakalayong barangay sa Davao de Oro.

Lisod gayud ang dalan padulong Manurigao. Gawas sa layo kini sa lungsod, igo lamang nga makaagi ang mga motor ug tao sa mga dalan padulong diri. Apan karon, sa hinay-hinay nga pagdevelop sa maong barangay, nahimo nang posible ang pag-agi sa mga dagkong sakyanan aron maghatag og serbisyo para sa mga residente niini. Usa na diri ang scholarship program gikan sa Technical Education and Skills Development Authority (TESDA).

Kaniadtong May 14, 2021, usa si Ate Anle sa mga benepisyaryo nga naka-graduate sa Processing of Food by Salting, Curing, and Smoking leading to Food Processing NC II gikan sa TESDA scholarship program nga gipahigayon sa ilang barangay.

Dako ang atong kalipay nga nakahatag kita’g bag-ong paglaum ug oportunidad sa pagpanginabuhi para ila Ate Anle ug sa mga residente sa Manurigao pinaagi sa nahimong programa sa PLGU Davao de Oro, ilawom sa pagpangulo ni Gov. Jayvee Tyron Uy, kauban ang TESDA ug MLGU New Bataan.

Sumala pa niya, nadungagan na siya og kaalam aron magsugod og bag-ong panginabuhian. Kung aduna na siya’y gamit para niini, makaya na niyang magsugod og negosyo. Nagalaum sab siya nga kung mahatagan og higayon, gusto sab niyang kuhaon ang sunod nga NC II course para mas mulalom pa ang iyang kaalam kabahin sa food processing.

Mabuhay ka, Anle Maestro ug ang tanang mga taga Manurigao!

Sa atong pagbayanihan, kaya gayud natong makab-ot ang paglaum ug tinuod nga kalinaw sa Davao de Oro.

Related Post