Al’law nang Kalumonan 2024 naghatag kasadya sa kaigsuonang lumad sa Davao de Oro

Subay sa tema sa pagsaulog sa ika-26ka tuig sa Davao de Oro nga “Bulawanong Pagtinabangay ug Panaghiusa para sa Malig-on nga Probinsya, kini naga rekognisa ug naga pasalamat sa padayong pagtinabangay ug panaghiusa sa bulawanong katawhan sa probinsya lakip na niini kontribusyon sa mga kaigsuonang lumad aron makab-ot ang mga kalampusan taliwala sa mga hagit nga nahiaguman niini. Kini gipamatud an sa probinsya pinaagi sa pag saulog sa ika-17 nga Al’law nang Kalumonan isip usa sa mga highlights niini karong adlawa Marso 7, 2024.

Nahimong mabulokon ug puno ug kasadya ang Capitol grounds human sa nagkadaiyang aktibidades sa Al’law ng Kalumonan nga gisalmutan sa kapin 650 ka mga lumad gikan sa mga inilang tribal group sa probinsya nga naglangkob sa tribong Mansaka, Mandaya, Kagan, Dibabawon, Manobo, ug Mangguangan nga nag sul ob sa ilang kaugalingong tradisyonal nga suot.

Sigon ni Governor Dorothy Gonzaga atol sa iyang pagpamulong “Giapil jud nato ang atong mga kaigsuonang lumad o IPs sa atong selebrasyon kay gawas nga karong adlawa, naa gayod ang provincial ordinance nga nirekognisa ang atong IPs or IP Day nato karon, kondili gitagaan gyud mo namog dako nga importansya kay dili ingon ani ang hitsura karon sa Davao de Oro kung dili tungod ninyo”

Gipadayag usab ni Provincial IPMR Matikadong Albert P. Camana ang iyang pag pasalamat ug pag awhag sa panaghiusa sa tanang tribo sa iyang pag-ingon

“ Magpasalamat kog dako sa inyo, sa inyong pag suporta sa tanang programa sa Gobyerno, ug unta ang tanan nakong gisulti, atong hatagan ug bili ilabina ang atong panaghiusa ug atong paglantaw usab sa gobyerno”

Ang mga aktibidades niini naglangkob sa kulturanhong pasundayag sama sa mga Tribal Dance ug Beads Making nga nagapakita sa ka talagsaong kultura nga anaa sa probinsya. Samtang, aduna usab gipahigayon nga releasing of honorariums alang sa 243 ka mga IP beneficiaries.

Nagmalampuson ang maong kalihokan pinaagi sa pag salmot ug aktibo nga supporta sa mga lideres sa probinsya nga mao sila Governor Dorothy P. Montejo Gonzaga, 2nd District Representative Hon Ruwel Peter S. Gonzaga, BM Vivencia Secuya, BM Ruwina Gonzaga,BM Teodoro Arancon, NCIP Regional Director Geroncio Aguio, NCIP Provincial Officer Roger S. Lumbin, Provincial Police Office Provincial Officer PCol Benedicto Faco ug 1001st Infantry Brigade Commander BGen Felix Ronnie B Babac. Mi duyog usab ang mga trabahante sa kapitolyo sa maong kalihukan pinaagi partisipar ug pagsuot sa tribal attire o tradisyonal nga suot. (Christelle Faith Luste)