BAG-ONG “OPISINA SA KATAWHAN” ABRI NA SA DDO

Mas “accessible” na sa mga katawhan sa Davao de Oro ang bag-ong opisina sa gobernadora, Governor Dorothy-Montejo Gonzaga kun ginatawag nga “Opisina sa Katawhan” diin nahimotang sa 1st Floor kanhing Tourism office nga maoy una makit-an sa mga katawhan kun galing mosulod sila sa Executive building sa kapitolyo.

Opisyal kining gi blessing-ngan karong adlawa (September 5, 2022) sa panguna ni Fr. Adok Biliran atol sa gipahigayong opening ceremony sa pagselebrar sa ika 122nd Philippine Civil Service Anniversary.

Saksi sa maong seremonya sila Board Members Ruwina Gonzaga, Vivencia Secuya, Teodoro Arangcon, Albert Camana, PG Head ug Assistant Department Heads, mga empleyado sa kapitolyo ug mga partners sa nagkalain-laing national government agencies sa probinsya.

Sa pagsulod sa buhatan, unang makita ang mantra sa bag-ong administrasyon mao ang “government works”, sa sulod nga bahin anaa ang conference room nga magamit alang sa mga importanteng panagtapok o meeting, aduna usab receiving ug waiting area para sa mga katawhan.

Tungod niini, mas mapasayun ug mapadali sa mga senior citizens, persons with disabilities ug uban pa nga gustong makahinabi si Gov Gonzaga aron personal nga mapaabot ang mga ilang mga katuyoan ug panginahanglan.

Ang “opisina sa katawhan” nagpasabot nga ang gobyerno adunay pagtagad, tinud-anay nga pag-alagad, ug abri ang mga serbisyo nga angay matagamtagaman sa mga katawhan sa Davao de Oro. (R. Hortizano)